كنت قاعد في مكتبي بالادارة العامة للسجون و الإصلاح الاتنقلت ليها بدون سبب من موقعي بالداخلية تاديبا” لشخصي الضعيف في سابقة ما حصلت في تاريخ الشرطة السودانية .. المهم يا مؤمن كنت قاعد في المكتب و جاء كشف بتاع تنقلات ضباط داخلي .. لاحظت انو حركة التنقلات الجديدة مع التنقلات القبلها ما حركة طبيعية لانو في ضباط كفاءة و متخصصين كانو ماسكين سجن كوبر باحترافية كبيرة تم نقلهم من السجن على راسهم اللواء صلاح العود و جابو بدلهم ضباط اداءهم ضعيف جدا” و ما بعرفو لاعمال السجون و جابو معاهم رتبة وسيطة كل سنين خدمته كانت في سجون الاطفال ( اصلاحية ) .. انا اندهشت من الحركة دي و قمت راجعت ملف سجن كوبر و لاحظت انو في فواتير لكاميرات المراقبة و الانترنت ما دفعوها و لاحظت تاني لكم ملحوظة كده و قمت سجلت الملاحظات و دخلت لمديري الكان مدير لسجن كوبر و نقلوه للرئاسة و هو اللواء صلاح ( العود ) و ختيت قدامه كشف التنقلات للعلم و قدمت ليهو ملاحظاتي و قلت ليهو عندي إحساس انو سجن كوبر ده ح تحصل فيهو كارثة بالطريقة دي .. و قتها كان رده رد الزول الما في يده حاجة و بعد مرور تلاتة اسابيع حصلت حادثة الهروب الشهيرة .
تحليل المخاطر او تحليل البيانات و المعلومات علم من العلوم لو عملت فيهو دكتوارة ما ح تبقى ناجح في شغلك لو ما عندك الموهبة و المحبة للعمل .. و اكبر خطر مهدد للدولة هو الموظف ( الحافظ و ما فاهم ) و اسهل عمليات اجهزة المخابرات البتستهدف الدول هي وضع الموظف الفاشل في الموقع المهم .
البوست ده طويل بس مهم جدا في نظري و لو كباية قهوتك جاهزة و بدون دواء و سكر معناها ما ح تفهم كلامي و ما حتقدر تكمل البوست .
من اول ايام اعتصام القيادة كتبنا هنا انو ارتكازات قوات الدعم حول محيط القيادة العامة ما معناها تأمين للقيادة بل هي في وضعية هجومية و عبارة عن كماشة او حصار للقيادة لكن كالعادة طلعوا لينا الضفادع يسخروا من رؤيتنا و لامن كانت قيادة الجيش بتصنع سواتر ترابية حولها و تقفل الكباري بالحاويات كتبنا هنا و قلنا دي إجراءات ما عندها علاقة بالمظاهرات و انو ده إجراء إحترازي لهجوم محتمل .
اي ثائر اختفى قسريا” كنا بنقول انو ديل الدعامة خطفوهو لحدي ما استشهد بهاء الدين على يدهم و لو كانت عملية اختطافه ما فيها اخطاء ما كان في زول ح يعرف انو الدعامة اختطفوه و ما كنا ح نعرف انو حي ولا ميت حتى اللحظة ذي كل الثوار الاختفوا من بداية المواكب .
كنت دايما” بتهم الدعم السريع بعمليات الإغتيال الكانت بتستهدف الثوار في الشوارع و المواكب لكن الناس كانت عايزة يكون المتهمين هم الشرطة و الجيش و ما كانوا بيقبلو كلامي ابدا” .
خطة الدعم السريع كانت بتهدف لصنع شرخ كبير جدا” بين الشعب و قواته النظامية .. كانت بتصيد الثوار بواسطة قناصة و عناصر مدربة داخل المواكب .. بيستفزوا القوات النظامية و بمجرد ما القوات النظامية تشتبك مع الموكب بيقوموا القناصة او عناصرهم جوة الموكب يختاروا الضحية و بي كده المتهم معروف و هو القوات النظامية .. ده ما ينفي انو في قوات نظامية ارتكبت جرائم قتل بس دي حالات فردية لا يمكن تكون ممنهجة .
المهم الدعامة كانوا بيضربوا عصفورين بي حجر .. صناعة شرخ بين الشعب و قواته و رفع وتيرة الغضب الشعبي تجاه الجيش و تشتغل الآلة الإعلامية على كده .
الخطة كانت مبنية على انو يوصلوا الشعب السوداني لمرحلة انو يقتنع تماما بانو ( ما عنده جيش ) و ما عنده شرطة و ما عندو أمن و البديل منو للاجهزة دي يا كائن؟
البديل موجود ياخ .. البديل هو الدعم طبعا” .. قوات نضيفة و مهندمة و بتلبس احسن من باقي القوات النظامية و تدريبها عالي جدا” و سجلها في الثورة نضيف و الدليل انهم رفضوا تعليمات البشير بقتل تلت الشعب السوداني .. البديل موجود و جاهز لانو إحنا شايفنهم بيشتغلوا شغل مكافحة المخدرات و شغل مكافحة التهريب و شغل فض النزاعات القبلية و شغل حرس الحدود و شغل الامن الاقتصادي و شغل الامن الجنائي و شغل تأمين المرافق و تامين البترول و حتى تأمين لجنة التمكين و شغل الدفاع المدني و مافي حاجة ما اشتغلوها .
يااخ باختصار صنعوا صورة ذهنية عظيمة في عقول الشعب السوداني الطيب و ده شغل شاركوا فيهو القحاطة و صنعتو شركات دولية كبيرة و متخصصة بتحسين الصورة و التلميع .
المخطط ده نسيجه معقد جدا” و اذا حاولنا نفكك خيوطه ح نهدم فكرة شرحه و استيعابه .. ذي بيت العنكبوت يستحيل تفكك خيوطه و تعيد ترتيبها لمصلحة الشرح .. ح تلقى نفسك دمرت البيت و توهت معاك القارئي تماما” .. عشان كده كنت بوجد العذر لاي زول يسخر من رؤيتي او ما يقدر يستوعبها .
كتبنا قبل كده و شرحنا انو اي جريمة في الدنيا لازم قبل ما نوجه الاتهام نشوف تلاتة حاجات مهمة لكشف الجاني او المتهم .. نشوف الدوافع شنو ؟ و نشوف المستفيد منو ؟ و نشوف كبش الفداء منو ؟
و شرحت في بوست سابق انو جريمة فض الاعتصام كانت اهدافها بعيدة شديد و خطيرة جدا و دوافعها كانت تصفيات للثوار المؤثرين و لو جمعت كل الثوار الاستشهدوا و راجعت مواقفهم تجاه الدعم السريع ح تلقاها كانت مواقف قوية جدا و رافضة وجوده و دي كانت بتهدد موقف الدعم السريع لانهم كانوا مؤثرين وسط الشباب و الدافع الاهم كان هو وضع الجيش في قفص الاتهام و كسب كروت تفاوض كبيرة و صناعة هوة كبيرة بين الجيش النفذ مطالب الثوار باسقاط النظام و حماهم قدام القيادة في رمضان .
و لو نظرنا للمستفيد حنلقاهم الدعامة و القوى السياسية و كبش الفداء هو الجيش .. طبعا انت و بتقراء في كلامي ح تكون عايز تقول لي ( ليه الجيش قفل ابوابه قدام الثوار ؟ ) ح اقول ليك لانو الهدف البعيد من فض الاعتصام و الخطة الاساسية كانت بتعتمد على انو الجيش يفتح البوابات للثوار .. و لو الجيش كان فتح البوابات كان الدعامة دخلوا و سيطروا على القيادة و قبضوا قيادات الجيش بتهمة قتل الثوار امام القيادة فالخطة كانت مبنية على انو القناصة يهاجموا الثوار و تتفتح الابواب و يدخلو الثوار و في نصهم استخبارات الدعم و وراهم قوات الدعم و تحصل الفوضى المن خلالها يسيطروا تماما على القيادة .. الموضوع ده انا شرحتو في تلاتة بوستات قبل كده .
كل المؤشرات و المعطيات و المعلومات و كل تحليلاتنا كانت بتؤكد انو الدعامة بيخططوا انهم يفصلو الجيش و القوات النظامية من الشعب السوداني عشان يستفردوا بالسلطة و الحكم و يدمجو الجيش داخل الدعم السريع .. الخطة دي اشتغلوها بعض القوى السياسية القذرة مع الدعامة و بدعم خارجي بكل خسة و ندالة و خبث .
فهل يعقل انو ما كان عندنا قرون إستشعار داخل الجيش تحلل و تضع خططها وفق خطة الشيطان دي ؟؟
هل يعقل انو قادة الاستخبارات ما انتبهوا لشعارات معليش ما عندنا جيش و وقفوا عندها بعلامة الخط الأحمر ؟ اكيد والله عندنا لكن للاسف منهم من قضى نحبه في جوبا و منهم من تم نقله و تسريحه تحت شعارات إزالة التمكين عشان كده شفنا انو اول موقع سقط في يد المرتزقة هو ( معهد الإستخبارات ) الكان زمان اسمه ( مدرسة الإستخبارات ) مع انو مافي فايدة تذكر من احتجاز طلاب و موظفي معهد الاستخبارات و لا يعتبر هدف عسكري لكن ده اكبر دليل على انو في طابور داخل هيئة الاستخبارات .
ثقتي كبيرة جدا” في الهيئة دي و في قيادة الجيش و متأكد انهم قادرين يتركوا الجفلن و يقرعوا الواقفات بعد إمتصاصهم للصدمة الكبيرة و عسى ان تكرهوا شيئا”و هو خير لكم .. الخير جاي والله بعد ما تمايزت الصفوف و انكشف المستور و انفضح الخونة و العملاء .
البوست ده كل المذكور فيه انا كتبتو ليكم قبل كده و هسه جيت عملت ليه تكثيف بالليل ده و ح اعمل ليهو جدولة نشر عشان الفيس ينشروا ليكم الصباح و قلت ليكم المعلومة دي عشان تعرفو انو وقت نشر البوست ح اكون نايم و ما معروف البحصل شنو من هنا للصباح .. بس متاكد انو الصباح ح تكون اخباره سمحة وبشرياتو جميلة لانو بواسلنا في شرق النيل راقدين فوق راي و قبيل الاتصالات كانت كعبة لانو الشفاتة والواقفين قنا نضفوها نضافة ريش الجداد قبل الطبخ .
بالله اسالو لينا سيد اللوري الجاب الجداد ما برجع الريش ؟؟
النصر للقوات المسلحة و الخزي و العار و مزابل التاريخ لكل من باع و خان و قتل و ارهب و هرب و صمت عن الحق و دافع عن الباطل .
نزار العقيلي
