نشرت الفنانة ميادة قمر الدين على صفحتها بالفيس بوك :
إحساس مرير بالعجز والحسرة على البيحصل فى مجتمعنا الفنى…المجتمع البيخاطب الوجدان وقائم فى الأساس على المشاعر… المجتمع البيعكس ثقافتنا وتراثنا وقيمنا ويمثل واجهة للبلاد فى الداخل والخارج… المجتمع البيتكون من كلمات وألحان وموسيقى وتمازج… الفيهو العمل الفنى بيعتمد على التعاون والمشاركة!!
من المحزن إننا نتحول لى ساحة من المهاترات والعداء الغير مبرر ونخلى الناس تنقسم حولنا ونشطر الوجدان إلى شظايا من التنمر والحرب الخفية والمعلنة.
أتمنى من صميم قلبى تسود روح المحبة والزمالة بين الجميع… ونكون رساليين فى فننا وتأثيرنا على الناس والمجتمع.
وبقول الكلام ده للجمهور الحبيب وكلى أمل فى إنكم تبقوا لينا السند وتوجهونا التوجيه الصحيح وتستوعبونا وتترفقوا بينا وتراعوا مشاعرنا وتبقوا أداة دعم وإصلاح بعيداً عن معاول الهدم والأذى.
وربنا يقدرنا ونكون حلقة وصل بين الأخوان ونسد الثغرات ونبسط المحبة ونتذكر إنو ربنا أكرمنا بشوية شهرة ونجاح عشان ننفع الناس ونلمهم.. ماعشان نتشتت ونشتتهم.
ربنا يصلح كل الحال.
