في بداية معركة الكرامة سميت الفريق اول البرهان بـــ( ألفا ون ) لاني كنت بشوف إنو تكتيكات الجيش السوداني شبيهة دائماً بتكتيكات الصيد الخاصة بالذئاب لانو قطعان الذئاب في التنظيم الهيكلي و الحركة بتاعتها بتشبه الجيوش النظامية لحد كبير جداً و بيشتغلو كلهم ككيان واحد لتحقيق اهدافهم و بنلقى عندهم مستويات هرمية داخل المجموعة شبيهة تماماً بالمستويات الهرمية للجيوش حتى على مستوى الرتب ، و ذي ما الجيش فيهو قائد عام و نائب للقائد و رئيس اركان كذلك بنلقى الذئاب بنفس المستوى تماماً عندهم القائد ( الفا ون ) و النائب او المساعد الاول ( البيتا ) و قائد الحرس او القوات الخاصة ( الدلتا ) و الاستخبارات ( الاوميغا ) و الإنضباط عند الذئاب هو السمة السائدة ، يعني عسكريتهم ناااااشفة جداً.
و لامن جيت وصفت الفريق اول شمس الدين كباشي ما وصفتو بـ( البيتا) وصفتو بــ( الجاكوار ) و الجاكوار هو النمر الأسود المشهور جداً بشراسته الشديدة و بيتميز بالصبر و طول البال في الصيد و بالاضافة لسرعته العالية مشهور برضو بالتسلق و السباحة و سرعة الانقضاض و الأهم من ده كلو انو خطورته في إنو بيبدع في الكمون و المفاجأة ، يعني بيلبد كويس و يظهر فجأة للفريسة، و اخر حاجة ح تدهش القارئ إنو نمر الجاكوار ما بيقاتل بس عشان ياكل و يعيش ، من مميزاته العجيبة إنو بيقاتل عشان منطقته و أرضه بشراسة شديدة، و عشان مميزاتو دي اختار مؤلف قصة ( ماوكلي ) شخصية باقيرا عشان يكون صديق و مدرب لماوكلي و كان بيخلي باقيرا يظهر فجأة دائما و ينقذ ماوكلي، و الظهور المفاجئ لباقيرا ما كان من خيال المؤلف بل هي واحدة من مميزات النمر الأسود.
و بما انو ظهور الفريق كباشي في مناطق العمليات ارتبط بعمليات الهجوم و الانتصار الكاسح اصبح عند الاغلبية من السودانيين قناعة تامة بانو الكباشي لامن يظهر في مكان معناها ح تكون فيهو انتصارات كبيرة و معركة كسر عظام، لكن المرة دي ما أظن ظهور الجاكوار كباشي مرتبط بانتصارات في كردفان، فالجاكوار صاحب مفاجآت دائماً و بيحب يخلي فريسته تعيش حالة نفسية و توتر شديد بعد تشم ريحته في المكان و الدعامة حالياً بعد ظهور كباشي في كردفان عايشين في توتر و قلق شديد و ما قادرين يعرفو الجاكوار ح يطلع من وين و متين ؟
حسب تحليلي لتكتيكات الجيش السوداني خلال الحرب و اسلوب قتاله ممكن اقول ليكم ظهور باقيرا في كردفان فعلا للتحضير لعمليات كبيرة و الوقوف على جاهزية القوات لكن اسمعوها مني كلمة المرة دي بتختلف تماماً عن باقي زيارات باقيرا للخطوط الامامية الساخنة ، المرة دي فيها مفاجأة من العيار التقيل ح نشوفوها في الساعات او الايام الجاية باذن الله و ح تكون حسب تكتيك الذئاب و تحركات الجاكواريون .
نزار العقيلي
