(سير سير يا بشير) وعشان ما يجيني واحد ناطي يقول لى (كاااك) وبتاع . تتذكروا الحركات دي و(مُش عارف) ندوسو دوس تتذكروها يا شباب ؟ (يا حليلهم) ما دائم إلا وجه الدائم .
المهم يا صاحبي مواطنو منطقة الكباشي شمال بحري هم من هتف عصر الجمعة الماضية معترضين سيارتين او ثلاث تقل وفداً من (شتات) ما تبقى من (قحت) على متنها (منقة وصامولة وجرادل) وفى رواية أخرى و رابعهم (سلك) .
هذا الركب (الميمون) كان في طريقه لإقامة ندوة بمدينة الجيلي اظن موضوعها (المُعلن) هو وحدة (قحت) اوحاجة بالشكل ده . وأظن الجماعة أخدوا ليهم (درشة) كويييس من اعتراض السيارات والهتاف الذى اوجع قلوبهم (سير سير يا بشير) وأهل الكباشي يعلمون أن البشير سجين وأن حكمه قد زال ولكن الرسالة كانت أقوى وأبلغ من هتاف ! (فاهمني يا اسطى) ؟
الصور التي رأيناها ليلاً على فرضية ان الندوة قد أقيمت (أنا غايتو) ما عاوز أبهتهم ساكت لكن الشافتو عيني دى (حافلة) ما بملوها ! وقناعتي أن الندوة أصلاً لم يكن موضوعها الاساسي (وحدة القحاتة) بقدر ما هي حشد ليوم الثلاثين من يونيو
و(بيني وبينكم) الجماعة ديل ورطوا (خااالس) مع السيد (فولكر)
قول لي كيف ؟
أقول ليك أنا …!
تتذكروا جلسة الحوار التي (فجأتن) رفعها فولكر الى أجل غير مسمى دون ان يبدي اسباباً لذلك ؟ وتتذكروا ما رشح في الانباء يومها عن ان السيد فولكر (رقع) أربعة طويلة بمبلغ (٥٠٠) الف دولار لتحريك الشارع يوم ثلاثين يونيو! وبعدها (قد) وأضعها بين قوسين قد يعود للحوار وقد لا يعود . (حسب نتيجة اليوم الموعود .
(أهاا) يا صاحبي
القحاتة الآن في أسوأ حالاتهم الصحية .
فالشارع وتحريكه (وانتو براكم شايفين) ! وأجهزتنا الأمنية والاستخباراتية وقاااايمة بالواجب تماماً . واللملمة وحصلت . والضبطيات واكتملت . والرصد وقد عد عليهم أنفاسهم عداً . و(كووول) الجحور والشقق وضبطيات (الآيس) والأسلحة النارية والبيضاء (راحت عليهم شمار في مرقة)… شفتو الورطة دى كيف ؟
والأجهزة الأمنية (عادتن) لا تعلن عن خطتها إلا في التوقيت الذى تراه مناسباً وما تسرب خلال الأيام الماضية يؤكد أن (الجماعة) راحو فيها . أهاا يا عب باسط فى الحالة دى حكاية الخمسمائة الف دولار يحلوها كيف مع الحااااج ؟
(والله) إلا يشوفو ليهم فكي غايتو !
المطلوب منكم عزيزي وابني الشاب اليوم داك أن (تلزم بيتكم) !
حا تقول لى ليه ؟ صاح ؟
أقول ليك أنا ….
عشان نطبق فيهم نظرية (التسلل) في كرة القدم . بناتنا الحلوات طبعاً ما حا يكونن فاهمات الحتة دي أقول ليكم يا بنات
خط الدفاع في كرة القدم مننن (الاستوبر) والباكات و(الثيرد باك) وحتى لعيبة الوسط بعملوا حركة تقدم سريعة كده نحو منتصف اللعب متفق عليها لترك الخصم لوحده بمنطقة الجزاء فالحكم في الحالة حا يصفر (تيييت) كحالة تسلل والجماهير في الحاله دى حا تهتف (سارق سارق يا حكم) .
أهاا انا عاوزكم تعملوا الحركة يوم الخميس (الجاي) .
(طيب) حا تقول لى حرام عليك يا أستاذ ليه نعمل فيهم كده صاح ؟
حا أقول ليك عشان نعرف ثقلهم وعددهم الحقيقى يا ابني وقواعدهم الجماهيرية وجحافل الثوار المصدعين بيها روسينّا دى ! وقاعدين يدمروا بيها فى البلد فاهمني يا حلوين ؟
عشان كده بقول ليك يا ابني اليوم داك الزم بيتكم بس وأخلف (رجل فوق رجل) واستمتع بمشاهدة المباراة في أكثر من قناة حتى تعلم حجم التزوير والتضليل الذى سيمارس وبالذات (ركّز لىّ) على (قناة الجزيرة) وقارن (براااك) عشان تشوف الكضب على أصوله ياخ ديل دمروا اليمن (بصبغة حمراء) ! وديل يتكلموا ويكذبوا بلا حياء وفى كل حتة في العالم إلا (الدوحة) محل الكشكوش يا عمك . عاملين اضان الحامل طرشا ! فاهمني ولو (نقنقت) يقولوا ليك (حرية صحافة) ! تباري لى الكلام ده لمممن يدمروا بلدك . سامعني يا …….
أيضاً عزيزي الشاب وعزيزتي (بتنا) الحلوة (لازم نكون عندنا دم شوية) .
فإننا من هذا المنطلق ننظر بإشفاق وتعاطف تااام مع (أولادنا) القحاتة أسرى المخدرات والشقق الحرام لما يحاك ضدهم ويدبر لهم بليل فندعو لهم بالهداية وصحوة الضمير ونحث أسرهم وأهاليهم أن يكونوا حذرين لحجم المؤامرة التي تستهدف الوطن وتستخدم أبناءهم كوقود مجاني لهذه المحرقة .
واتعهد بدفع (مليون دولار ) مليون شنو ؟ قول اتنين ياخ لمن يأتيني بسلك أو فكي منقة أو وجدي صامولة أو مدني جرادل او غيرهم على قيادة و صدر أي من مظاهراتهم .
وندعو الأجهزة الأمنية والعدلية ان تكون يقظه (وبالغانووون) والضرب بيد من حديد لكل من يستهدف مقدرات وشباب هذا الوطن فكفانا تراخي وطبطبة فإشارات المرور والانترلوك والطرق واللوحات الاعلانية والمباني الحكومية ومقار الشرطة والكهرباء والمياه ليست ملكاً (لقحت) .
قبل ما أنسى : ــــ
إن صحت فاجعة الـ(٥٠٠) الف دولار ! فإننا نعلن عن كااامل تعاطفنا وشعورنا بخيبة الامل مع السيد (فولكر) . و الجاتك في مالك سامحتك (يا حاج) .
