السودان اليوم:
* أوضح (بترينة) عرض من خلالها (الشوايقة) حنيتهم وطيبتهم هي اغنياتهم.
* واغنيات شمال السودان بخلاف الحنية والواقعية تجدها قد حفلت بقدر كبير من (الواقعية وحسن التشبيه والحوار) .
* وليس هنالك تشبيه أجمل من تشبيه جعفر السقيد في أغنية (جرح الريدة) عندما قال : (زول كانت مشاعرو عليك جاري زي الحجر في الفلعة) .
* شبه لهفة قلبو تجاه المحبوب بالحجر في (الفلعة) أو (الفلقة) .
* وقصد بذلك إبراز السرعة .
* لما تجي (تفلع) زول بحجر بتفك الحجر بقوة فيمضي بسرعة من يدك فيصيب الهدف .
* تشبيه فيه (صورة واقعية بالغت الحسن والحضور) .
* (جرح الريدة كان ينعد من ضمن العجائب السبعة) هي أغنية كاملة الدسم والحزن .
* وإذا كان الجرح العاطفي عند السقيد (من ضمن العجائب السبعة) فإن الجلوس على (كرسي رئاسة الهلال هو من ضمن العجائب الثمانية) .
* كرسي رئاسة الهلال غير كل الكراسي .
* كرسي بيرفعك قدرا ومكانة ، ولذلك (شعب الهلال) تجده (شديد الحساب) لكل من يجلس على هذا الكرسي .
* شعب الهلال يعرف قدر هذا الكرسي جيدا ، ولأنه كذلك تجده لا يتهاون في المحاسبة .
* الآن يتقدم السوباط من أجل الجلوس على الكرسي .
* ونستطيع أن نقول (ياداب سيتولد السوباط من جديد) .
* سيدخل التاريخ وستشهد حياته تغيرات كبيرة بغض النظر عن سلبية أو إيجابية هذه التغيرات .
* حتى قبل أسبوع كان السوباط (نكرة) بالنسبة لنا نحن في الهلال وفي الوسط الرياضي ، بل في الحياة الاجتماعية السودانية بصورة عامة .
* مؤكد للرجل حضور وشهرة وسط رجال المال والأعمال ولكنه (نكرة) في الوسط الرياضي والحياة السودانية .
* وبعد أسبوع من الآن سيكون السوباط على كل لسان سوداني (مدحا أو ذما) .
* الهلال يصنع النجوم ويقدم الرجال للحياة بشكل مختلف .
* (حكيم الهلال) طه علي البشير رقم اقتصادي صعب ورجل صاحب تأهيل عالي ورئيس لمجموعة من الشركات والبيوتات التجارية ، وهو (ناصية) في مجال المال والأعمال.
* ولكن طه علي البشير بلغ قلوب أهل السودان عبر بوابة الهلال.
* ويكفي أن (الحكيم) الذي يسبق إسم طه هو صناعة هلالية خالصة .
* واظن وليس كل الظن إثم أن طه على البشير يحب لقب (الحكيم) الذي منحه له أهل الهلال أكثر من حبه ل(الدكتور) الذي منحه له التعليم العالي .
* صلاح إدريس رجل يضرب به المثل في الثراء وله ما له من استثمارات ونجاحات إقتصادية كبيرة .
* ومع ذلك (الزول السوداني) لم يعرف صلاح إدريس إلا بعد ظهوره في مجتمع الهلال .
* أمريكا (ضربت مصنع صلاح إدريس – الشفاء) ولم يشتهر صلاح .
* أمريكا ضربتو لكن ما شهرتو.
* اشتهر في الهلال .
* عبد الرحمن سر الختم لم تمنحه العسكرية النجومية ولا المناصب الدبلوماسية التي شغلها.
* الهلال هو الذي وضع سر الختم في واجهة الحياة السودانية .
* الكاردينال قال : أنا جيت الهلال وكنت رقم في الإقتصاد لكن لما فزت برئاسة الهلال ما نمت للصباح) .
* وذهب أبعد من ذلك عندما قال :(رئاسة الهلال زي لما تحب بت ويعرسوها ليك) .
* ده الهلال يا السوباط .
* ده السودان يا سوباط .
* الهلال مجتمع كبير وحياة قائمة بذاتها ، حياة بتشوف فيها كل حاجة .
* بتشوف فيها الما شفتو قبل كده .
* الهلال غالي ، وكل غالي (مهرو غالي) .
* براك شفت .. ١٧ مجموعة هلالية تقدمت لحكم الهلال .
* إرهاب عديل .
* ده الفرق بين الهلال وغيرو .
* هسه مش سوداكال أكمل السنوات الثلاث في رئاسة المريخ ؟
* السوباط في أسبوع واحد سيكون أشهر وأبلغ تأثيرا من سوداكال .
* ده الفرق يا مولانا .
* المريخ مجتمع صغير لا يصنع النجومية ولا يمنحك الحضور .
* ١٧ مجموعة تقدمت ، والمريخ مما قام ما مروا عليه ١٧ رئيس .
* جمال الوالي (صديق عمر بشير) براهو قعد ١٤ سنة ولو ما الثورة قامت تاني كان بيقعد ١٧ سنة .
* ما يقعد كيف وما في زول في المريخ بدق صدرو عشان يبقى رئيس ؟
* المهم.
* نقول للسوباط : حبابك في الهلال وحدنا معاك فريق الكرة .
* أحسنت بنقول ليك أحسنت ، فشلت بنقول ليك فشلت .
* وسنقدم لك نصائح اعتبارا من الغد ونرجو أن تفيدك .
* بكرة إن شاء الله سنقدم لك نصيحة تحت عنوان (ما تدي الصحفيين قروش) .
* ح أوريك القروش بتعمل شنو في الصحفيين.
* نشكر الكاردينال على السنوات الست ونتمنى له التوفيق في حياته القادمة ونثمن روحه الطيبة وهو يعلن مباركته ودعمه للجنة تطبيع الهلال .
* والشكر لكل كبار الهلال ونأمل أن نفتح كلنا صفحة جديدة بيضاء ونمضي بهلالنا إلي الأمام.
* ونركب صافنات ونجيبة (هلالابية) واصلو الزول بيموت والذكرى تفضل حية .
* و..و..
* والله في .
The post قروش الحكيم والأرباب يا سوباط !!.. بقلم محمد الطيب الأمين appeared first on السودان اليوم.
