اللقاها (السوباط) في الهلال ..(ترامب) في الانتخابات الامريكية ما لقاها.. بقلم محمد عبد الماجد

السودان اليوم:

· انتوا لو شفتوا الحالة في المريخ – والله بتعذروهم …الفيفا مضايقاهم اكتر من (البحر).

· انتوا فاكرين الدرجة الثانية بعيدة – اسمعوا كلامي دا ..ما تابوه المريخ في خطر.

· حلوا مشاكلكم مع (الفيفا).

· الدرجة الثانية ما بعيدة منكم.

· المريخ حالتو اصعب من توتي.

· على الاقل توتي فيها (تروس) وما عندهم مشكلة ..بيقدروا على (النيل)..المشكلة في المريخ.

· توتي فيها شباب زي الورد.

· المرة دي لا في عبدالرحيم محمد حسين …ولا في جهاز امن ومخابرات…عشان يدفع ليكم.

· لا اوكتاي ولا اسامة ونسي ولا معتصم جعفر.

· يعني اكربوا بطنكم ساكت.

· تتخيلوا المريخ امس في يوم واحد – في اقل من نص ساعة صدموا بهذه الاخبار.

· (تلقى نادي المريخ، صدمة جديدة من الاتحاد الدولي لكرة القدم (فيفا)، حيث صدر قرار جديد ضد النادي من قبل الاتحاد والذي حكم لصالح المدير الفني الأسبق البلجيكي لوك إيمال بمبلغ وقدره (60) ألف دولار عبارة عن مستحقات مالية واجبة السداد…وسابقاً دفع المدرب البلجيكي بشكوى ضد المريخ مطالباً من خلالها بتسوية حقوقه المالية مع النادي…وأمهل الاتحاد الدولي، المريخ (45) يوماً لسداد المبلغ المحكوم به لصالح المدرب البلجيكي، كما يتوقع أن يتسلم مجلس الأحمر خطاباً رسمياً بالحكم الصادر خلال الساعات المقبلة).

· بعد نص ساعة نزل الخبر دا:

· (منح الاتحاد الدولي لكرة القدم”فيفا”، نادي المريخ السوداني مهلة لمدة”30″ يومًا لسداد مستحقات المعدّ البدني الروماني السابق ماريوس..وأرسل”فيفا” خطابًا إلى نادي المريخ السوداني وفق ما علم”باج نيوز” من مصادره للفصل في أزمة الروماني ماريوس…وسابقًا، كان الاتحاد الدولي لكرة القدم قد أصدر حكمًا لصالح المدرب الروماني بعد تقديمه شكوى ضد نادي المريخ، وطالب”فيفا” بمنحه”27″ ألف دولار من مستحقاته بطرف النادي).

· 87 الف دولار في لحظة – غير الحاجات التانية والعقوبات والغرامات السابقة التى فرضت من الفيفا.

· النيل ارحم.

· وفوق الكلام دا – المريخ في التسجيلات القادمة عنده (7) عناصر قيدهم في المريخ سوف ينتهي بقيادة رمضان عجب ومحمد الرشيد وابو عشرين…والتش ذاتو خلاص بقى (حرت رت).

· على مشارف الخروج.

· عشان كدا (الولولة) و (الجقلبة) البعلموا فيها ناس مزمل ابوالقاسم الايامات دي طبيعية.

· خايفين على (التش).

· اعذروهم.

· استحملوهم.

· النادي (اتفرتك).

· ما معروف لغاية الآن – المريخ عندو مجلس ولّا لا؟.

· المجلس مستمر ام انهار؟.

· آدم سوداكال ماسك بي اسنانو في المريخ ..كل ما يقولوا خلاص المجلس انهار يظهر ليهم الصادق مادبو.

· وبالقانون.

· اقالة الدكتور مدثر خيري من المكتب التنفيذي للمريخ – عملت فيهم عمائل.

· فرتكت المريخ.

· الشافكم مع النيل شندي والنيل الحصاحيصا ما كضب.

· والمرة دي لا في حكومة ولاية ولا في جهاز امن ومخابرات.

· اعتمدوا على روحكم.

· شيلوا نفسكم.

· وحنفي الابهة (اوكتاي) الذي كانوا يعولون عليه في مثل هذه المواقف هارب من البلد ..وطالع (امر قبض) عليه.

· قروش (اوكتاي) عندهم زي (العسل)…لكن (السوباط) لا.

· قروش جمال الوالي ما فيها أي مشكلة احسن زول – لكن (السوباط) لا.

· بالمناسبة أي ادانة او تهمة تثبت على (السوباط).. واى فساد له ما عندو ليه ضهر ولا نصير … اهلا بذلك …ومرحب بالمحاسبة ما في أي مشكلة.

· الوسط الرياضي ما فيه (غطا).

· أي زول عمل غلط يتحاسب.

· لكن في ظل هذه الاشياء …لا تنسوا ان اشرف الكاردينال ادار الهلال وهو عندو علاقة بالنظام البائد وعليه اتهامات وإدانات سابقة.

· وصلاح ادريس عندو مشاكل في السعودية.

· وعارفين علاقة جمال الوالي بالنظام السابق …والأموال التى ادخلها الوالي للمريخ وافدنة الباقير وبنك الثروة و..و ..وبرضو الوالي مرحب به في المريخ حتى الآن.

· ولا تنسوا كذلك ان ادم سوداكال ادار المريخ من (السجن)…وما في حاجة ثبتت عليه او ادانة صدرت في حقو…لذلك ما في زول بقدر يقول عليه حاجة رغم (الشبهات).

· هسع وقفنا على (السوباط).

· أي ادانة او فساد يثبت على الرجل …ما في أي مشكلة ..يتحاسب زي غيرو.

· نحن ما عاوزين نقول السوباط (وطني) كبير او شارك في الثورة وندعو الناس لتصديق ذلك.

· ما عاوزين نغش الناس.

· ولا عاوزين نقول السوباط ما (كوز).

· ولا عاوزين نقول عنو (بطل) ..او ما في شبهة فساد عليه…ونقعد ندافع عنو.

· ابدا والله.

· عاوزين نقول نحن وانتوا كلكم ابحثوا عن (الاثبات) و (الادانة)..عشان المواضيع تبقى واضحة.

· زمن الدسدسة والغتغتة انتهي.

· والحريات متوفرة.

· والقضاء نزيه.

· والاعلام مفتوح.

· ولجنة ازالة التمكين موجودة.

· واي زول يعمل غلط يتحاسب…او يفرفر برة الصندوق …ممكن يتحاسب ويترمي في السجن.

· واي زول افسد في العهد البائد يتحاسب طوالي.

· ما في حماية لزول دون الاخر.

· ما في زول بيحميه المريخ او الهلال.

· لكن نقول ان لجنة التطبيع الهلالية تم اختيارها بواسطة تنظيمات الهلال ودكتور كمال شداد.

· ونحن نثق في تنظيمات الهلال ونثق في دكتور كمال شداد.

· واي تجاوز للسوباط او غيرو مرفوض.

· الذي اريد ان اعلق عنو في هذه النقطة هو (العويل) و (النحيب) و (الردحي) الذي حدث في المريخ بعد تعيين السوباط رئيسا للجنة تتطبيع الهلال.

· الناس ديل مالهم؟.

· الحاصل عليهم شنو؟.

· أي موضوع تحصل فيه (جرسة) قدر كدا من الدكتور مزمل ابوالقاسم …اعرف فيه خطر على المريخ.

· من زمن والي قطر.

· وكلتشي.

· وسادومبا.

· وداريو كان وقابيتو قبل ذلك.

· كل هذه الاشياء المريخ (اتجرس) فيها.

· وجرسة المريخاب الايامات دي واضحة.

· قالوا هشام السوباط (مريخابي)..انتوا لو عندكم مريخابي بالشكل دا ..كان قعدتوا تحنسوا في جمال الوالي (الهلالابي).

· لو السوباط (مريخابي)….كان صبرتوا على آدم سوداكال الذي فاز بالتزكية واصبح رئيسا للمريخ من (محبسه) دون ان يجد من ينافسه على رئاسة المريخ.

· على الاقل كان تجيبوه ينزل وينافس سوداكال.

· نحن لغاية الآن ما عارفين رئيس المريخ منو؟.

· سوداكال معتمد ام لا؟.

· تخلوا مقعد الرئاسة في المريخ (فاضي) وتقعدوا تسكوا في (السوباط) رئيس الهلال.

· السوباط ناس قالوا (كوز).

· وناس قالوا (مريخابي).

· والموية بتكضب الغطاس.

· عاوزين نشوف الرد في التسجيلات القادمة يا الطاهر يونس.

· اثبتوا لينا انو ما عندكم علاقة بالنظام السابق.

· بالمناسبة (الرياضة) و (كرة القدم) تحديدا .. ما عندها علاقة بالجنس او القبيلة ولا بتضع اهمية للون السياسي.

· كل هذه الاشياء في الرياضة ما عندها قيمة.

· المهم بس يكون الزول واضح وشريف وما عندو مشكلة (قانونية).

· ما فيه تهمة وإدانة عليه.

· ناس المريخ طبعا ليهم (5) سنوات بحنسوا في (السوباط) يمسك ليهم المريخ.

· قال ليهم انا هلالابي ..قالوا ليه ما مشكلة …جمال الوالي ذاتو (هلالابي).

· عادي في المريخ.

· غايتو والله يا جماعة الهلال دا عالم براه.

· الهلال دا دنيا تانية.

· تصوروا مواقع التواصل الاجتماعي والوسائط الاعلامية كلها في الايامات الماضية ما عندها شغلة غير لجنة تطبيع الهلال.

· الكاردينال فهم حاجة.

· فاكر الموضوع بقيف عندو.

· الهلال ما بقيف عند زول.

· لو بقيف عند زول كان وقف عند الطيب عبدالله.

· صلاح ادريس فات ..لغاية الآن ما عارف درب الرجعة بي وين؟…(لا وصلت ليك لا الرجعة تاني عرفتها).

· الهلال ما عندو كبير.

· تنظيمات تتصارع.

· ودنيا تقوم وتقعد.

· وحروبات ..وخلافات.

· وكل زول عاوز يبقى رئيس الهلال.

· الهلال كدا.

· اللقاها (السوباط) في الهلال من شهرة ونجومية …وتريندات …وحراك ..(ترامب) في الانتخابات الامريكية ما وجدها.

· يحسدك (ترامب).

· على العموم نحن في مرحلة (انتقالية) في الهلال ..زي (المرحلة الانتقالية) التى تمر بها البلاد في الحكومة.

· قبلنا بالبرهان.

· وقبلنا بحميدتي في الحكومة.

· وح نقبل بالسوباط في الهلال.

· عاوزين ندخل للانتخابات …والديمقراطية الحقيقية.

· الحمدلله ان لجنة العضوية في الهلال برئاسة القانوني الضليع الطيب العباسي.

· عاوزين نمشي للمرحلة القادمة ولصناديق الاقتراع بالقانون.

· عاوزين نكون في الوضع السليم.

· ادعموا هلالكم ..وابقوا معاه.

· فنحن مازالنا نحلم بهلال يفرض سيطرته على المستوى القاري والعالمي.

· …………

متاريس

· 120 يوم فترة لجنة التطبيع …عاوزين نشوف الكتير.

· الهلال برضو عندو مشاكل في (الفيفا)…لكن في جود هذه اللجنة ان شاءالله سوف يتم التغلب عليها.

· الدكتور كمال شداد ادار الملف باقتدار.

· وهكذا هم (الكبار).

· لولا الدكتور كمال شداد ..كان حصل فوضى في الرياضة.

· الكاردنيال اعلن دعمه للجنة …وهذا هو المنتظر منه.

· الكوارتي لو عندو (شدة) و (قدرة)…الـ 120 يوم ما بعيدة…خليك جاهز.

· الصناديق ترحب بكم جميعا.

· اصلو ما في مشكلة.

· ادعموا الاستقرار.

· وابقوا في ضهر الهلال.

· وما تسمحوا لي زول يفرتكم ..او يشق صفكم.

· ………

· ترس اخير : الهلال دائما هو في الفؤاد ترعاه العناية.

The post اللقاها (السوباط) في الهلال ..(ترامب) في الانتخابات الامريكية ما لقاها.. بقلم محمد عبد الماجد appeared first on السودان اليوم.