السودان اليوم:
* في زمن (البشير) كنا بنمشي (نقيل) في البحر .
* وفي زمن حمدوك البحر بقى يجي (يقيل) معانا .
* كانت رحلتنا إلي البحر والآن البحر رحل عندنا .
* حقيقة ما عارف كعب عمر البشير ولا (غتيت) البحر .
* غايتو واحد فيهم صاح.
* ارتبطت (الشعيرية) ارتباطا قويا بيوم الجمعة .
* حتى أننا كنا نظن أن أكل (الشعيرية) لا يجوز إلا يوم الجمعة .
* الواحد فينا لو جابوا ليهو شعيرية يوم الأربعاء بياكلها بالدس .
* ممكن تأكل الشعيرية يوم (الأحد) لكن بتكون خجلان من (الجمعة) .
* فهم بؤضو .
* كانت بتعاني من تساقط في (شعر الحاجب الشمال) .
* جرتو بالقلم لكن (القلم ما ببقى شعر) .
نصحوها تقابل أخصائي .. قابلتو وقرر ليها (عملية زراعة) .
* زرعت الحاجب لكن الشعر قام عكس . الشعر بدل ما يطلع بره محل الحاجب قام قام ليها لجوة محل المخ .
* هي الآن عبارة عن (حاجب جوة) و(حاجب بره) .
* تشوفها تحلف تقول عربية طافية نور .
حالة صعبة .
* السلام هو (عافية الأوطان) ، ولو وصلت كل الأطراف السودانية لهذه القناعة سيكون البلد (بخير وعافية) .
* تظل فرحتنا منقوصة ما لم يلحق عبد الواحد والحلو بالركب .
* البلد بتتبني بالعرق ما بالدم يا أولاد الحلال .
* أسوأ (سبعة) حاجات في الدنيا دي (خمسة) هي : (مسمار الباب البشرط ليك القميص وانت في عجلة من أمرك) و(البت أم لقمة كبيرة) و(الكلب الما بتراجل وينبح فيك إلا بعد يشوف البنات في الشارع) .
* الحياة قبل كورونا وبعد كورونا اختلفت اختلاف كبير .
* قبل كورونا (السكر) بالكيلو و(السفر) بالمحطات.
* وبعد كورونا السفر بقى بالكيلو وربما يصبح السكر بالمتر .
* تجي لبتاع الدكان تقول ليهو اديني (نص متر سكر) ، وتمشي لبتاع السفريات تقول ليهو : (مسافر لي سبعة كيلو وجاي)
* وغايتو جنس غايتو
* نحن وأولاد حلتنا كان عندنا غرام عجيب مع شاي البكا .
* بنحبو أكتر من شاي الفرح .
* لو سمعنا في زول مات بنمشي نعزي الشاي وبنشرب الفاتحة .
* تلقانا شايلين الفاتحة وعيونا في صبارة الشاي.
* وفلسفتنا في الموضوع انو النسوان بيكونن مخلصات لحظة الحزن .
* بعملن الشاي بضمير.
* ما بكلفتن الشغلة .
* بيكونن حزينات وخايفات من الموت .
* الواحدة تعمل ليك الشاي بحزن وإخلاص وشفافية كمان .
* وبما أن ذلك كذلك .. التحية لكل (بت) قاعدة تعمل شاي في بيت البكا والتحية كمان لكل (مرا) قاعدة تعمل سلطة أسود في بيت العرس .
* (99%) من أبناء الشعب السوداني الفضل يتركون (الزرارة الفوق) فاتحة ..
* نادر جدا تلقي ليك زول (مُزرر) الزرارة الفوق ، والغريبة كل (القُمصان) عندها (زراير فوق) ..
* الزرارة الفوق مخصصة لـ(الكرفتة) . *وإحنا الكرفتة عندنا زي (البُرجم) بنلبسها مرة في العُمر .
* البُرجم بيجي للزول مرة في العُمر والكرفتة بنلبسها يوم العرس الذي هو مرة في العُمر .
* قصة وأخرها لسه .
* دمج (الشاي مع اللبن) هو في الأصل إختصار للكبابي ..
* زي دمج فاتورة الكهربا (المافي) مع فاتورة الموية (المافي برضو) ..
* دمج فاتورة الكهربا مع الموية هو إختصار وتسهيل للتحصيل ..
* وشاي اللبن يمكن أن تشربه بالطريقة التقليدية المعروفة ويمكن أن تشربه عن طريق (كبايتين) ..
* تجيب (كباية شاي أحمر) و(كباية لبن) وتشرب من الكباية دى جقمة ومن الكباية التانية جقمة ..
* يعنى بدل تجمع (الشاي الأحمر واللبن في كباية واحدة) تخلى كل واحد في كباية براهو وتشرب من الكبايتين ..
* في الحالة دى خلط الشاي باللبن ح يتم داخل (البطن) وليس في (الكفتيره) أو (البراد) ..
* وأنا حقيقة النظرية بتاعت شاي اللبن دي عايز الهلال يعملها مع عبد الرؤوف والتش .
* جيبوا لينا الشاي (الأحمر) ما دام نحن عندنا اللبن .
* فهم برضو .
* ونركب صافنات ونجيبة (جنوبية) واصلو الزول بيموت والذكرى تفضل حية .
* و..و..
* وبلقي الدنيا فرحة لما ….. (أكل شعيرية يوم الثلاثاء) .
The post لو أكلت الشعيرية يوم (الأربعاء) بتكون خجلان من (الجمعة) !!.. بقلم محمد الطيب الأمين appeared first on السودان اليوم.
