السودان اليوم:
* من أقسي وأقصي مراحل العلاج (البتر) .
* (بتر) أجزاء من الجسد حتى تذهب (العِلة) ولو بشكل نسبي .
* في بعض الأحيان يكون خيار العافية هو (البتر) .
* تقطع من جسمك عشان تبقى كويس .
* (البتر) عند الإنسان المعافى يسمى إصابة أو عاهة ، وذات (البتر) عند بعض المرضى هو عافية وصحة ، وهكذا يقدر الله .
* وبما أن ذلك كذلك فأن (العافية من كورونا تكمن في التعايش معها وليس الخوف منها) .
* الخوف هو مرض قائم بذاته .
* والطريقة التي يتعامل بها الناس مع كورونا تحتاج لعلاج .
* نصف الشعب سيحتاج لعلاج نفسي بعد انتهاء كورونا .
* لابد من التعايش مع هذا المرض ولابد من التعامل معه بصبر وقوة بعيدا عن الهلع والانكسار .
* الحظر والسجن الكبير الذي نعيش فيه ويعيشه العالم أجمع هو موت بطئ .
* اكتئاب وزهج وحزن .
* الفراغ قاتل جدا ، وكلما عاش الإنسان فراغا كلما أطلق العنان لخياله وسرح ومرح في أمور قد تصيبه بالهلع والحزن المميت .
* اقتلوا الفراغ بما يفيد .
* طبعا الشعب السوداني كلو الأيام دي شغال (ليدو) .
* وبمناسبة الليدو .
* بعض منا يتفاءل بأرقام معينة وهنالك أرقام يتشاءم منها البعض .
* ولعل الرقم (9) هو من الأرقام المحببة وكذلك الرقم (10) ، والرقم (7) ، ولكل منا رقم يحبه .
* غير أن الرقم (6) هو من الأرقام التى تبدو (نجوميتها) أكثر من عادية .
* الرقم (6) نجوميته أقل من نجومية الرقم (10) و (9) .
* لا تعرف قيمة ونجومية الرقم (6) إلا في (قيم الليدو) .
* في الليدو الـ(6) مهمة جدا جدا .
* وفي هذه الأيام الشعب السوداني يعرف أهمية الرقم (٦) .
* البلد كلها شغالة ليدو .
* في الشارع ليدو .
* في الدكان ليدو .
* في البيوت ليدو .
* لو كانت كورونا تموت بهذا الليدو لقتلها الشعب السوداني .
* ياريت لو كان الليدو علاج لكورونا .
* الله يقطع سنين كورونا ياخ .
* كورونا خلتنا لا نعرف الأيام.
* الليلة السبت ولا الخميس ما في زول عارف .
* بكرة الجمعة ولا الأحد الله اعلم.
* حتى احساسنا بالتاريخ والشهر بقى ما في .
* طبعا إحساس الناس بـ(آخر الشهر) يختلف من زول لزول .
* في ناس بنتظروا آخر الشهر بفارق الصبر .
* وفي ناس كان عليهم آخر الشهر ما يجي أصلو .
* وخوف الناس من الشهر هو خوف من (الماهية) .
* إرتباط (المرتب) بأول الشهر أو آخر الشهر هو الذي خلق حساسية بين الشعب السوداني و(آخر الشهر) .
* والله صحي .
* بقى بينا وآخر الشهر حساسية وكراهية عديل كده .
* العندو (أقساط) ، والعندو (إيجار بيت) ، والعندو (سلفية) .
* قصة صعبة .
* لكن مع كورونا بقى احساسنا بالشهر والأيام إحساس ميت .
* وأكتر شئ محير في موضوع كورونا هو عجز العلماء عن إيجاد دواء لهذا المرض .
* صنعوا العربيات والموبايلات ووصلوا القمر وغلبهم اللقاح .
* يقول ليك اللقاح داير ليهو سنة أقل حاجة .
* فصاحة ساكت .
* نمسك في ربنا وح نعدي بإذنه تعالى .
* و..و..
* والله في .
The post ياريت لو كان (الليدو) بعالج كورونا ؟؟.. بقلم محمد الطيب الأمين appeared first on السودان اليوم.
