كشفتها لجنة التمكين .. نجيلة المريخ ونجيلة مزرعة البشير واااااحد !!.. بقلم محمد الطيب الأمين

السودان اليوم:
* ورد بصحيفة (قوون الإلكترونية) أمس خبر يتحدث عن تكون لجنة لمحاربة الفساد بالوسط الرياضي .
* الفساد الماضي ولا الفساد القادم ؟
* لابد من أن تقوم هذه اللجنة بفتح ملفات الفساد السابق .
* بل إن الوسط الرياضي يحتاج للجنة إزالة تمكين ومحاربة فساد اسوة باللجنة السياسية .
* اللجنة التي سيتم تكوينها حديثا ستخرج لنا بلاوي .
* غايتو نحن في الهلال الحمدلله القروش حقت الكاردينال.
* الحكومة ما عندها جنيه في الجوهرة الزرقاء .
* الحاجة الوحيدة الشاركت بيها الحكومة في الجوهرة الزرقاء هي (رقصت البشير) .
* غير رقيص البشير ونطيط عبد الرحيم محمد حسين الحكومة ما عندها حاجة في الجوهرة .
* (عود) الحكومة في الهلال هو (عود مرا) ما عود راجل .
* لكن تعال شوف المريخ .
* المريخ في عهد الإنقاذ وتحديدا في فترة جمال الوالي التي استمرت (١٤) سنة ، في الفترة دي المريخ كان هو نادي الحكومة المدلل .
* المريخ في الفترة ديك لما عمل (جضوم وكرش) .
* جمال الوالي ١٤ سنة يشيل من قروشنا ويدعم المريخ .
* وبعد ده ياريتو لو كان دعم بفائدة .
* وصافة وتمهيدي وفصاحة ساكت .
* عشان كده الموضوع ده محتاج ليهو لجنة إزالة تمكين .
* وبقترح اللجنة دي يكون رئيسها وجدي صالح .
* هكذا أقترح.
* وأي زول طبعا حر في (مقترحاتو) .
* وأول حاجة اللجنة تبدأ بمصادر أموال (الرد كاسل) .
* من وين ؟
* طابق شاخور من وين ؟
* المقصورة الطائرة من وين ؟
* حوض السباحة والصالة من وين ؟
* من جمال الوالي طبعا.
* وجمال الوالي شنو ؟ الوالي كوز من الدرجة الأولى وأحد أبناء الرئيس المخلوع .
* يبقى اللجنة لازم تفتح ملف المريخ .
* البداية من النجيلة .
* نجيلة إستاد المريخ ربما هي نفس النجيلة بتاعت مزرعة البشير بتاعت العنب .
* نجيلة المريخ ونجيلة مزرعة البشير بشربو من موية واحدة.
* نفس المصدر .
* المليارات والطيارات الخاصة والبوفية المفتوح .
* البوفية المفتوحة ده بالذات عندنا شهود .
* بلة جابر شاهد على حكاية البوفية المفتوح .
* المحترفون .
* جمال الوالي في السنة الأولى كان بجيب المحترفين بالدستة.
* والله صحي .
* برسل أبو جريشة نيجيريا بقول ليهو جيب ليك ستة سبعة قطع.
* شيكوزي.
* وشيكورا .
* وانتينا.
* وجنينة .
* قلت ليك كان بجيب بنص الدستة .
* زي (شيلة العروس) .
* وبعد داك دخلت مرحلة الدافي وهيثم مرابط ووارغو.
* كمان مشى العراق جاب ليهو ربع دستة .
* مشى مصر .
* مشى لحدي البوسنا.
* حصل سمعت ليك بنادي في العالم جاب ليهو مدافع من البوسنا ؟
* جمال الوالي عملها .
* جاب مدافع اسمو نجاد من البوسنا .
* نجاد لما جا كان عمرو ٤٦ سنة .
* هسه بيكون كورونا لحقتو امات طه .
* الملفات التي تنتظر اللجنة كثيرة جدا .
* وأي لاعب اتسجل في زمن جمال الوالي حقو تتم مصادرتو لصالح الشعب .
* رمضان عجب يتصادر يمشي الهلال(نادي الشعب) .
* أمير كمال يتصادر يمشي الخرطوم الوطني .
* صلاح نمر يتصادر ويقعد في بيتم.
* الشغلانية ما أراضي بس .
* كلو بالقانون.
* عشان كده يفترض المريخ يتخلص من أولاد جمال الوالي .
* مش الكيزان سجلوا الأراضي حقتهم باسماء اهلهم وأصحابهم ؟
* المريخ المفروض يعمل كده .
* رمضان عجب خلوهو يمشي سيمبا التنزاني.
* أمير كمال ودوهو الغزالة جوبا .
* اتخلصوا منهم قبل المصادرة.
* حتى البطولات المحلية التي حققها المريخ في عهد جمال الوالي تحتاج لمراجعة من لجنة الفساد وإزالة التمكين .
* حتى النقاط فيها فساد .
* والبطاقات الملونة .
* كلو محتاج مراجعة .
* هسه إستاد المريخ ده أنا عندي فيهو كيلو سكر .
* التش عندنا فيهو (ربع عدسية) .
* وكلو بالقانون.
* انا والله المزعلني إنو القروش الدفعها جمال الوالي ما حققت إنجاز للمريخ خلاف الوصافة .
* لدرجة إنو الصحف العربية أطلقت على المريخ لقب (ضل الهلال) .
* المهم .
* اللجنة حقو تشوف شغلها من الليلة .
* ولما تجوا تعلنوا الحاجات المصادرة من المريخ جيبوا لينا عثمان حسن مكي يذيع القرارات.
* وتبكوا بس .. عين قطرة وعين مس .
* ونركب صافنات ونجيبة (هلالابية) واصلو الزول بيموت والذكرى تفضل حية .
* و..و..
* والحنين الجيتني بيهو جاني في ……. (زمن إزالة التمكين) .

The post كشفتها لجنة التمكين .. نجيلة المريخ ونجيلة مزرعة البشير واااااحد !!.. بقلم محمد الطيب الأمين appeared first on السودان اليوم.