السودان اليوم:
* قبل ظهور (عربيات النفايات) كانت (الكوش) جمع (كوشة) مصدر رزق لكثير من (المشردين) و(أطفال الشوارع) .
* طبعا عربيات النفايات هي حاجة كده زي (فصل الربيع) بنسمع بيها سمع .
* لكن على أرض الواقع لا (فصل الربيع) قاعد يجينا ولا عربية النفايات بتجينا .
* (الكوشة) حتى قبل (١٥) سنة كانت من الأماكن والمعالم المشهورة في الأحياء.
* كانوا بيوصفو بيها ، يقول ليك : في كوشة جمب عمود الكهرباء خليها على يدك اليمن وامشي طوااالي .
* زمن كانوا أهلنا بيحذرونا ما نمشي جمب الكوشة بعد المغرب .
* يقول ليك : الكوشة (بيت الشيطان) .
* أهلنا رسخوا لينا فهم إنو (الكوشة بيت الشيطان) والشيطان ما برجع بيتو إلا بعد المغرب .
* أ تقول الشيطان ده بالنهار شغال في السوق العربي .
* (أولاد الشوارع) كانوا بيستهدفوا (الكوش) الواقعة جمب بيوت الناس المرتاحين.
* كوش الأثرياء بتلقى فيها كل حاجة .
* وكلها حاجات (بحالة جيدة) .
* ممكن عادي في كوشة الناس المرتاحين تلقى ليك (علبة مربى) فيها (مربى) .
* نحن طبعا (علبة المربى) بعد تكمل بندخل فيها (رغيفة) عشان (نكنس) المربى اللاصقة في (العلبة) .
* وبعد نكنسها بالرغيفة بنكسر العلبة وبنلحس القزاز .
* مرة عندنا صاحبنا وفي واحدة من (الكوش) الخمسة نجوم لقى ليهو (ساعة كاسيو) .
* الساعة دي عيبها الوحيد فيها شق في (قزاز الشاشة الخارجي) .
* شال الساعة ولبسها وقرأ بيها الثانوي كلو ودخل بيها الجامعة بعد داك بدلها بساعة شبابية .
* ساعة شغالة زي السلام عليكم .
* الناس ديل كانوا (برموا) حاجات قيمة جدا باعتبارها (بايظ) .
* بزار وشبع وعدم فهم .
* وبما أن ذلك كذلك فإن الكاردينال وعلى طريقة (الساعة الكاسيو) رمى كثير من (البايظ الما بايظ) .
* رمى حاجات في نظرو (بايظة) وهي لا بايظة ولا حاجة .
* رمى امبومبو .. والليلة امبومبو مطلوب في مازيمبي.
* رمى موكورو .. ومكورو مشى هلال الأبيض نشف ريق الهلال والمريخ وبعد داك أحترف في الدوري المصري .
* رمى بكري المدينة .. وبكري ٢٠١٥ شال المريخ في كتفو.
* رمى محمد عبد الرحمن ومكسيم وسيسية وبشة وباتريك وبلاتشي .
* وأي واحد من ديل كان عبارة عن (ساعة كاسيو) .
* أما أقيم ما رمى الكاردينال على الإطلاق هو المدرب السنغالي لامين انداي.
* وهو ما نحن بصدده الآن.
* نصيحتنا الثانية لرئيس الهلال السوباط هي إعادة هذا المدرب السنغالي الخطير.
* انداي مدرب مقتدر وصاحب مدرسة وبصمة وهو واحد من صناع نهضة مازيمبي .
* السنغالي وفي شهور قليلة جدا إستطاع أن يدخل ثقافة جديدة في الهلال ولكن تمت إقالته لانه رفض التدخل في عمله .
* أو في الحقيقة هو الذي تقدم باستقالته عندما كان الهلال برفقة المريخ بأمارة أبوظبي وما أدراك ما هدف النعسان العكسي.
* نرجو من السوباط أن يعيد هذه المدرب ويمنحه كل الصلاحيات الفنية ولن يندم.
* نفتش هذا المدرب ونتفاوض معه وحتى إذا كان مرتبطا مع فريق آخر يمكن أن يدفع الهلال الشرط الجزائي .
* اصلا الفرق في أفريقيا (شرطها الجزائي) مرتب شهر ما أكتر.
* نرجع السنغالي ونجيب بشة في الجهاز الفني أو حتى في لجنة التسجيلات .
* الاستعانة بالشاب الشاطر عبد المهمين الأمين ضربت معلم وخطوة في الإتجاه الصحيح .
* نكمل هذه الخطوات بإعادة السنغالي انداي وبشة وجمال سالم .
* ننصح السوباط بأن لا يتورط في صفقات مدربين أجانب فاشلين .
* لو قعدت تسمع للسماسرة بقنعوك بمدرب ما مدرب .
* ناس المريخ في فترة حظر كورونا جابوا مدرب تونسي .
* وبعد فك حظر كورونا اكتشفوا إنو الزول ده (تونسي أي لكن ما مدرب) .
* قال ليهم أنا مدرب تونسي وطلع تونسي لكن ما مدرب.
* كتر خيرو برضو ما كضب عليهم شديد.
* كان صادق معاهم في حكاية إنو هو (تونسي) لكن كذب عليهم في حكاية إنو هو (مدرب).
* ونحن عشان ما نبقى زي جنس ده نرجع السنغالي بدون سمسرة وبدون غش.
* وأهم حاجة يا السوباط لما تجيب مدرب ما تدخل في شغلو ولا تسمح لزول من خارج المجلس يتدخل في شغل .
* ما عندك بيهو شغل حتى لو (ضبح) ليهو لاعب جوة الميدان ما تسألو.
* دي نصيحتنا ليك الليلة وباكر بنديك النصيحة التالتة .
* و..و..
* وهانت الأيام عليك ولا …….. (عشان لقيت ساعة كاسيو واقعة يعني) ؟
The post ما كل (المرمي في الكوشة) نفايات يا سوباط !!.. بقلم محمد الطيب الأمين appeared first on السودان اليوم.
