السودان اليوم:
* في العام (٢٠١٣) وتحديدا في يوم الإثنين الموافق (١٧ /٣) حصل خلاف حاد بين جمال الوالي رئيس المريخ (المستقيل) وقتها ورجل أعمال يسمى النور .
* طبعا (مستقيل) الاستقالة الوهمية ديك .
* جمال الوالي حكم المريخ ١٤ سنة ، وفي ال ١٤ سنة قدم استقالتو (٣٢) مرة .
* وشهدت هذه الاستقالات ال(٣٢) عدد (٤٤) مسيرة .
* مسيرة التحنيس.
* يستقيل يقومو يحنسو يقوم يرجع تاني وتاني يستقيل وتاني يحنسو .
* هو بحب التحنيس وهم بيحبو المسيرة .
* الإتنين متفقين .. بحبو المسيرة وهو بحب التحنيس .
* المهم .. حدث خلاف بين الوالي ورجل الأعمال النور
* وقد أوردت الخبر صحيفة (الأهرام اليوم) وجاء فيه : (نزاع حاد بين رئيس المريخ المستقيل جمال الوالى ورجل الاعمال الشاب النور وسبب الخلاف رقم تلفون ) .
* والله صحي .
* رقم تلفون هو سبب النزاع .
* جمال الوالى قال الرقم حقو والنور قال الرقم حقو
* الرقم كما نشرته صحيفة (الاهرام) هو (0123000000) .
* أوع تقول لي ده رقم خدمات المشتركين .
* أوع.
* ارجع الارشيف وفتش صحيفة الأهرام ولو ما عندك انا بجيبها ليك .
* جمال الوالي قال هو أشترى الرقم (قبل فترة) بمبلغ (٣٥) مليون جنيه .
* قال قبل فترة .
* يعني ممكن اشتراهو سنة (٢٠١١) .
* اما رجل الأعمال النور ذكر أنه أشترى الرقم من منفذ البيع بمبلغ (٨٥) مليون .
* الكلام ده (٢٠١٣) .
* في الزمن داك قطعة الأرض في كافوري بمبلغ ٣٠ مليون .
* في الزمن داك خمس رغيفات بواحد جنيه .
* رقم سعرو بيعادل قطع أرض درجة أولى.
* أنا لا أعرف في النهاية الرقم طلع من نصيب منو ولكن المؤكد أن الوالي ترك موهبة جمع الأرقام واتجه إلي جمع (الأراضي) .
* ١٥٧ قطعة أرض.
* يعني ١٥٧ أسرة يفترض تكون ساكنة .
* ١٥٧ أسرة يعني حوالي ٩٠٠ شخص .
* من يشتري رقم تلفون بثمن قطعة أرض في العام ٢٠١٣ غير مستغرب أن يملك ١٥٧ قطعة أرض في العام ٢٠٢٠.
* عادي .
* أصلا الكيزان بحبو (٧) حاجات (٥) هي : قطع الأراضي والباسطة وأرقام التلفونات المميزة .
* وجمال الوالي لم تظهر عليه أعراض الباسطة ولكن ظهرت عليه أعراض (الأرقام المميزة والأراضي) .
* ١٥٧ قطعة أرض والمريخ كل سنة طاير من التمهيدي.
* ١٥٧ قطعة أرض والمريخ الشهير بالإصيفر وصيف للهلال .
* شكلو جمال الوالي ده كل ما المريخ يخسر هو بيشتري قطعة أرض .
* في ناس كده .
* مش في زول لما يكون زهجان أو زعلان بيولع سجارة؟
* تلقاهو يشرب سجارة وراء سجارة ويقول ليك الرأس ضارب .
* كل ما يمر بمشكلة يكتر من شراب السجائر .
* اها نفس الفكرة .. جمال الوالي كل ما يزهج بيشتري قطعة أرض.
* الزول ده بفك زهجو بالاراضي.
* المريخ يطير بهنا هو يمشي يشتري قطعة أرض بهناك .
* الهلال يشيل لقب الدوري هو يمشي يشتري قطعة أرض.
* المريخ يتغلب من الوحدات الأردني بالسبعة هو يمشي يشتري قطعة أرض.
* الإصيفر يتغلب من هلال التبلدي بالخمسة هو يمشي يشتري قطعة أرض.
* بيتنفس بالاراضي .
* والنصيحة المريخ ده عشان تصبر عليهو إلا تكون بتشرب سجائر .
* وجمال الوالي ما بشرب طبعا ، عشان كده بفك الزهج بالاراضي .
* غايتو بعد سباعية الأردن ديك بكون اشترى المزرعتين.
* الصدمة بتاعت الأردن ما بتفكها قطعة أرض .
* مزرعة عديل .
* السبعة ما سبعة نصاح.
* قاسي يا شلباية.
* جمال الوالي الذي جاء إلي المريخ بطلب من عمر البشير غير مستغرب أن تكون بحوزته هذه الأراضي.
* ولكن أنا مصر أصرار شديدا أن المريخ سبب من أسباب شراء جمال لهذه الأراضي.
* ولذلك لجنة إزالة التمكين عليها أن تضع يدها على نادي وإستاد المريخ .
* ممكن تتم مصادرة إستاد المريخ لصالح موردة السودان .
* أو تتم مصادرته لصالح رديف هلال الشعب .
* نعمل مساومة .. نخلي الأراضي ال١٥٧ لجمال الوالي ونشيل الإستاد.
* أصلا الإستاد قاعد ساكت .
* طبعا لجنة إزالة التمكين ما عارفة إنو جمال الوالي سجل أكثر من عشرة لاعبين في المريخ وكان جزء من استحقاقهم (قطعة أرض) .
* جا زمن كده كان جمال الوالي بيديك قطعة أرض وبيسجلك في المريخ .
* اها القطع الشالوها اللاعبين ديل تتصرفوا معاهم كيف يا وجدي؟
* بلاوي .
* نقول ذلك ليس من باب الشماتة .
* بعد الأراضي دي كلها جمال الوالي اخير من غيرو .
* اي كوز لكن وقف مع الفقراء والمساكين وساهم مساهمات كبيرة في علاج الكثيرين ومنهم زملاء صحفيين .
* دي ما بننكرها ليهو .
* لكن كمان ما اوردته لجنة إزالة التمكين يعتبر حق عام .
* خط أحمر .
* ما فيهو لعب ولا فيهو هظار .
* نحفظ له ما قدم من عمل خير ونحاسبه في قطع الأراضي.
* ده براهو وده براهو .
* غايتو الحمدلله جمال الوالي استقال وما حضر مريخ الموسم الفات .
* كان الأراضي وصلت (٣٧٠) .
* لو مع كل خسارة للمريخ بيشتري قطعة أرض بعد شوية السودان كلو بيكون حقو .
* وغايتو جنس غايتو .
* و..و..
* ونركب صافنات ونجيبة (سودانية) واصلو الزول بيموت والذكرى تفضل حية .
* و..و..
* ولو مكضبنا وما مصدقنا اسأل ………. وجدي صالح .
The post شكلو كل ما يزهج بيشتري قطعة أرض بدل السجارة !!.. بقلم محمد الطيب الأمين appeared first on السودان اليوم.
