نفسي اشوف القون السابع في المريخ وصلاح نمر بحتج مع حكم الراية.. بقلم محمد عبدالماجد

الراى السودانىيوليو 13, 2020

السودان اليوم:
• احلي منظر ممكن تشوفه – الكورة في قون المريخ – صلاح نمر ماسك الشبكة ، ورمضان عجب بتكلم مع محمد الرشيد – والتش واقع في الواطة.
• لو عاوزين تشوفوا المشهد دا – شوفوا اهداف محمد أحمد بشه في المريخ.
• كلها بالصورة دي.
• هدف بشه في المريخ متى ما سجله تحلف تقول بتشاهد في (الاعادة).
• هدف (مكرر).
• في اكرم الهادي سليم.
• في الحضري.
• في رمزي صالح.
• هدف بالكربون.
• نفس الشيء.
• أي هدف لبشه في المريخ – بتلقى الصورة واحدة – وان تغيرت الاسماء.
• مرة صلاح نمر.
• ومرة بلة جابر.
• وكان لي علي جعفر …نحن ذاتو ما حاسبنو مع الجماعة.
• على جعفر كل (انجازاته) في مباريات الهلال والمريخ انو (غمز) عينه لزميله في المريخ من اجل اصابة عزيز شيبولا.
• بعد (الغمزة) دي …شيبولا طلع بعد اقل من (5) دقائق مصاب من الملعب.
• غير كدا ما عارفين ليه شيء.
• الآن النشاط واقف.
• والحظر قارب لاربع شهور بسبب كورونا.
• ولينا زمن ما شفنا لينا قون في شباك المريخ.
• مرة (سبت جكسا) جاب ليه قون في عصام الحضري في بورتسودان من الشلال السادس.
• الحضري بعد المباراة طلع يتكلم عن سبت جكسا (أنا شفت ناس ظالمين كتير ..بس انت اظلم من ظلم).
• ومرة (سولي شريف) وهو بيلعب في الاهلي الخرطوم جاب ليه قون في المريخ بعد ان ظلت شباك المريخ عذراء لمدة 6 اشهر.
• زي هدف (ود ابليس) لاعب العباسية في المريخ.
• أي هدف في المريخ (جميل) و (ممتع) زي اغنيات محمد الامين.
• لا والله ما محمد الامين.
• أي هدف في المريخ سريع وخفيف وممتع زي اغاني (السيرة).
• اغاني محمد الامين (تقيلة)…اغاني استماع.
• القفلة طالت علينا.
• اشتهينا (الدافوري).
• والبصلة مع ملاح البامية المفروكة.
• متعة الدافوري طبعا في الناس البتكون قاعدة برة ..ما في الناس البتلعب جوة.
• البتلقاه شايل ليه (بنبر).
• والبتلقاه شائل ليه (برش).
• والشائل ليه (كرتونة)…عشان يقعد عليها.
• وبين الفينة والاخرى بيجي والد بيبيع في التسالي والفول والدوم.
• اشتقينا للحاجات دي.
• زي دار الرياضة ام درمان الناس بتمشي عشان كمال افرو وجقود ..ما عشان يتفرجوا في الكورة.
• ونحن هسع (كورونا) – عصرت علينا.
• خلتنا نشتاق لاللمة.
• مرقة العصرية.
• وشاي المغربية.
• وبوش العشاء.
• نحن شعب بدون (اللمة) – ما بنعرف نعيش.
• الواحد (الاكل) ما بضوق ليه طعم لو ما كان في جماعة.
• كباية الشاي لو ما خمسوها معاك ..ما بتعدل ليك (نافوخك).
• طبعا الايامات دي ما في زول عندو (نافوخ).
• أي زول رأسو ضارب.
• (التفيح ود حسن) ..ما عندو أي خبر بالجائحة دي.
• ما سمع بيها.
• شغال في شغلو.
• التفيح ود حسن ..قالوا ليه (السريم ود عثمان) عندو (كورونا).
• قال ليهم بدل (الفولكس فاجن) متين؟.
• بعد يومين ..في واحد قابل (التفيح ود حسن) في الجامع ..قال ليه (السريم ود عثمان)…كتلتو (كورونا).
• التفيح ود حسن قال ليه هو وقت ما بعرف يسوق الفصاحة ليه شنو؟.
• الفولكس فاجن سائقها تلاتين سنة ما جاتو حاجة.
• التفيح ود حسن دا ذاتو وقت عيد الضحية بقرب ما بخلي ليه (سكين) في البيت.
• كل يوم بشيل ليه (5) سكاكين وبمشي على السوق.
• بجهز السواطير.
• والفرار.
• والعود الكبير.
• وبكون عندو هوس بتاع (سكاكين).
• والحبل البعلقو فيه الخروف ..حليل زمن الخرفان بتكون عاوزة ليها (حبال) عشان يعلقوها فيها.
• هسع الخروف ممكن يتسلخ وانت ماسكو في ايدك ..زي (الموزة).
• اها المرة دي …(التمع ود الطيب) ، لاقي ليك (التفيح ود حسن) ، شايل ليه كمية بتاعة (سكاكين) ونازل بيها على السوق.
• التميع ود الطيب (زول نصيحة)..قال للتفيح ود حسن ..يا اخوى السنة دي (الخروف) ما بحتاج منك لكل هذه (السكاكين).
• سكاكينك دي أي جزّار لو شافها بقول ليك عاوز الشيء الفلاني …يا زول والله ما في خروف بيستاهل (السكاكين) دي.
• السنة دي (الضبيحة) ممكن ينزلوها ليك ناس (غوغل) في (تطبيق) في الموبايل.
• والله الناس ديل عملوا أي حاجة.
• عليك الله هسع اهداف (بشه) الكان بجيبها في المريخ …من الحضري لي اكرم الهادي سليم ما بتحلف تقول اهداف سجلها عن طريق (تطبيق) في دفاع المريخ.
• تطبيق في (شبكة) المريخ.
• الهدف عند بشه ..اسهل من (الجدعة) عند موسى الزومة.
• علي جعفر ..طبعا ما قاعد احسبو ليكم مع الجماعة ديل.
• زول جاء المريخ وطلع منو ..ما في زول شاعر بيه.
• لاعب – الكورة عندو زي (كسير الحطب).
• ما عندها أي طعم.
• هسع يا جماعة والله بعد فك الحظر ..أنا هفت لي.
• هفت لي عديل كدا.
• نفسي اشوف الهدف السابع في شباك المريخ.
• وصلاح نمر واقف يتكلم مع حكم الراية ..محتج على الهدف.
• نفسي اشوف المنظر دا.
• عشان تاني يوم مامون ابوشيبة يطلع يهاجم كمال شداد.
• ومزمل ابوالقاسم يعمل فيها برة البلد.
• وهيثم كابو ..ينكر المريخ (حطب).
• ومعاوية الجاك ..يدور في مجلس الادارة.
• نفسي بس ..اشوف الهدف السابع في شباك المريخ.
• مرة شفت المشهد دا في مباراة المريخ والوحدة الاردني.
• ناس اكرم الهادي سليم ديل يتوقعوا متل (ظهر) الليدو.
• ومازدا واقف برة في المنطقة الفنية …ما عارف المريخ شايت على وين؟.
• ومعلق المباراة من كترة الاهداف بقى يتكلم برة رأسو.
• نفسي المشهد دا يتكرر.
• التميع ود الطيب الكلمتكم عنو فوق ..مرة طلع ليه (عنقريب) تحت ضل بتاع (نيمة).
• وشال ليه (مخدة) بدون (لحاف)..وقال نفسو في كسرة بي موية وملح وشمار وزيت وبصل وطماطم.
• ما اكتر من كدا.
• مرات نفسك بتدخل في حاجات ما منطقية.
• نفسي اشوف لي قلاب بتاع تراب مكتوب فيه (والرسائل العندي شيلها.. والصور لو درت برضو).
• نفسي اعمل لي (قلاب) بتاع تراب بس عشان اكتب المقطع بتاع اغنية عبدالعيظم حركة دي… (والرسائل العندي شيلها.. والصور لو درت برضو).
• المعني (الرسائل والصور) عاوزة ليها (قلاب تراب) عشان يشيلها.
• والله (مبالغة) كدا.
• نفسي في كباية شاي بي (قرنفل).
• والكباية ما مليانة للاخر.
• والزير بتاع الموية الباردة ما بعيد من الكلام دا.
• نفسي في (قميص ابيض) فيه (5) زرائر ..واحدة من الزرائر مقطوعة.
• نفسي اقيف في الباب الصباح ..وما في زول يقول لي عاوز (شاحن موبايل).
• نفسي في حفلة النهار بي محجوب كبوشية ..اطلع فيها (جلابيتي) واقول عاوز اتجلد ..يقوموا يمسكوني ويحلفوا علي.
• اوعكم تخلوني ..ضهري كعب.
• مرات بتفعل ساكت.
• لو قلت ليكم عاوز اتجلد ..ما تصدقوني.
• نفسي اضرب لي زول ..ما يقول لي والله هسع كنت عاوز اتصل عليك.
• نفسي في (جبنة) بي خمسين…اسفها ساكت ..وانا راجع على البيت.
• نفسي اول ما افتح (الراديو) ..القي العطبراوي ..بغني في (نسانا حبيبنا الما منظور ينسانا)..اقوم اقول والله (الراديو) دي ود حلال ..بيشعر بي.
• نفسي الجمعة القادمة يكون فيها (فطورين).
• امشي الطابونة ..القي طاولات الرغيفة مليانة ..وما في زول واقف في الفرن.
• نفسي والله اشوف القون السابع في شباك المريخ.
• ……………
متاريس
• رحل نجم النيل ولاعب الكرة الذي حقق شهرته ونجوميته بعيدا عن الهلال والمريخ طه ميلا.
• طه ميلا هو شقيق لاعب الهلال السابق مجيب الرحمان…ولاعب الهلال السابق ابوبكر الشريف متزوج من شقيقتهما.
• طه ميلا لاعب محبوب ..وكان مواصل نشاطه الرياضي ..وحتى قبل رحيله بدقائق معدودة كات يشارك في مهرجان في الجريف غرب.
• سجل في المهرجان هدفين ..ثم انتقل بعد ذلك.
• اللهم ارحمه واغفر له..والهم اهله وذويه الصبر والسلوان.
• …….
• ترس اخير : الكاردينال ماشي ..لا شفنا ساماتا ..لا الاخطر من ساماتا.