الراى السودانى
وجّه الممثل والإعلامي السوداني محمد جلواك رسالة للفتيات السودانيات عبر منشور أطلقه بفيسبوك حيث كتب جلواك في تغريدته التي رصدتها محرر الراى السودانى :
“يابنوتنا ابقن واعيات
دايرة تلبسي بنطلون وتفكي شعرك وتلبسي برموده ولا بلوزة مفتحة ولا تجي ام فكو عديل انت حرة.. غايتو اكان مسلمة ده حرام تب مافي كلام وعصيان لي ربنا لكن برضو انت حرة وانت واعية وعارفة ومابوروك..
اها كان ماك مسلمة عندك معتقد ولا دين سماوي تاني غير الاسلام ولا ملحدة ولا لادينية انت حرة وزول بجبرك مافي سوي الفي بالك البتقتنعي بيهو
بس!!!!!!!!!!!!!!!!!!!!!!!!!
يكون في احترام لي مشاعر الناس وعاداتهم وتقاليدهم ومشاعرهم خليني من غض البصر والتحرش والتنمر وخلافو من البحصل كشماعة لي سلوكن يابنوتنا هوي اسمعن كلامي ده كويس وافهمنو في نسوان كبار ورجال كبار وشفع صغار وناس متدينين وصادقين مابتجاروا ومابلعبوا بالدين والفئات بتاعة اعمامنا وخالاتنا وشفعنا دي كتيرة شديد نراعي لي مشاعرهم حبه لانهم الغالبية العظمي والغربيين البتقلدوهم ديل هم ذاتهم بحترموا الاديان والاعراف وبرخصوا المنتجات في رمضان للمسلمين.. والاقباط عندنا مابياكلوا قدام الناس في الشهر الكريم..
عشان كده اللبس الكعب والمطالبة بالحقوق والحريات والجندر والتشدد في تناول الاحتياجات العصرية
بتحسب عليكن قلة حيا وانطلاقة وعدم تربية قسما بالله.. حبه حبه الحقوق بتجي والزوق والادب والاحترام سمحات خلن السفاحين والقياصرة والاباطرة ينصاعوا والسلمية سقطت اقوي حكومة مرت علي البلد..
وانا ماوصي عليكن بس بقول البمليه علي ضميري وانتن حرات في سلوكن وربنا موجود وشايفنا وشايفكن
اها ودعتكن الله وكل سنة وانتن طيبات وفالحات وتاليات وقاريات وابقن واعيات… وربنا يلهمنا وإياكم الثبات ”
