البقرة (الضاحكة) ذاتها جابت ليها (تكشيرة)!!.. بقلم محمد عبد الماجد

الراى السودانىيوليو 18, 2020

السودان اليوم:
• مرة والي الدين محمد عبدالله جاب ليه قون ..قدامي كباية الشاي (احمر) ، رفعتها لقيت ليك الشاي (الاحمر) بقى (شاي بي لبن).
• ومحمد وردي بغني في (بشوف في شخصك احلامي).
• والي الدين رحمة الله عليه – عملها كيف ما تسألوني.
• نضارة القراية ما معاي.
• والي الدين كان جنو …وجن اللون (الاحمر).
• في الشاي ما بقبل بيه.
• مرة يوهانس عندما كان بيلعب في فريق (التحرير) الاريتري جاب ليه قون في المريخ ..حامد (بريمة) شوف عيني دي (اتبرم) 180 مرة ما قدر يطلع كورة يوهانس التى لعبها خلفه.
• خلوني احكي ليكم بي ايام زمان ..وهسع دي.
• الماضي والآن.
• الناس كتير بتتكلم في الموضوع دا.
• قالوا ليك زمان (طلب الفول) بيدوك معاه (شقة) – صالون و3 غرف وهول كبير مع المرافق.
• هسع (طلب الفول) لو قلت عاوز معاه رغيفة (زيادة) – المطعم كلو يفتح ليك خشمو.
• تقول قلت (حلايب مصرية).
• ينروا فيك من طرف.
• عندنا صاحبنا بنمشي نتعشى معاه في (دكان الحلة).
• صاحبنا بظبط الفول (صاح) …وفي النهاية بيجي يلقط القروش من الناس ..كل واحد يدفع (50) جنيه.
• يوم الخميس صاحبنا دا بعمل لينا نفس الفول ..لكن بشيل من أي واحد فينا (100) جنيه.
• الشلة فيها واحد – ما بقبل الحقارة …والقرش بطلع منو زي (ولادة الحبل).
• صاحبنا دا قال لي صاحبنا البيصلّح الفول ..انت ليه يوم الخميس بتشيل من أي واحد فينا (100) جنيه ..ليه ما بتشيل (50) جنيه زي كل يوم؟.
• صاحبنا البصلّح الفول قال ليه عشان يوم الخميس الفول بفتح ليكم فيه (علبة ساردين) يا فالح..عشان كدا بترفع السعر.
• الزول الما برضى الحقارة قال ليه والله نحن (علبة الساردين) القاعد تفتحها في الفول دا ما قاعدين نشوف ليها حاجة إلّا في (سعرك) البتحاسبنا عليه – دحين تاني ما تعمل لينا (ساردين)…نحن ما شاعرين بي فرق في الفول ..بي ساردين او بدون ساردين.
• بعدين نحن لو عندنا (100) جنيه ..نأكل فول ليه ؟…ما نمشي نأكل سمك.
• زي الزول البجيب في امتحان الشهادة السودانية كم وتسعين ..ويمشي يخشي ليه (كلية) ادبية.
• زمان – ودي حاجة يسألني منها الله ..رطل اللبن تشربو منو (شاي المغرب) وتتعشوا منو (فطير بي لبن)….وابوك يشرب ليه منو (كباية شب كبيرة)..والصباح تعملوا منو (شاي الصباح)…والباقي امك تعملوا (روب).
• هسع تعال شوف (رطل اللبن)….يدوك ليه في (الجك) زي عينة (الفحص).
• والله الواحد لو ما بخجل ..كان شالو في (فتيل).
• شاي اللبن وقت يجيبوه ليك – لو ما جابوا ليك معاه (مستندات) تثبت ذلك وقالوا ليك رطل اللبن بقى بـ 45 جنيه ما بتصدق انو القدامك دي (شاي بي لبن).
• الشاي بي اللبن بقى زي الزول الفي النيل الواقف براهو في الغرب ..وبكورك لي زول تاني واقف في الشرق عشان ينزل ليه (المركب).
• اللبن يكورك للشاي كوريك.
• زمان كنا بنتعشى (فطير بي لبن).
• حاجة اساسية عندنا فطير بي اللبن.
• هسع وقت تشتهي (الفطير بي اللبن)…يجيبوا ليك (الفطير) في صحن – ويقولوا ليك افتح (الواتساب) – عشان يرسلوا ليك (اللبن) في الواتساب.
• تشربوا (صور) ساكت.
• تتفرج في (اللبن) وتقرّض (الفطير).
• بالمناسبة دي قالوا ليك الخروف السنة دي بـ (20) الف جنيه.
• 20 الف جنيه ليه؟.
• الخروف تقول شايل ليه جواز دبلوماسي.
• والله لو الخروف بتجيبوا لينا معاه (شيتو بتاعة الجمر) برة ..ما بنشتريه بـ (20) الف جنيه.
• لو (المرارة) حقتو ..بتنقط (عسل)…ما بنشتريه بـ (20) الف جنيه.
• زمان عندي (قميص ابيض)…وقت اكون عاوز اقشر وامشي بيه على مناسبة مهمة – كنت بكوي القميص دا.
• وقت كمان اكون عاوز امشي بيه مناسبات ساكت ..وما مهمة بمشي بيه من غير (مكوة).
• والقميص بي مكوة …ومن غير مكوة يفرق.
• أنا ما كان فارقة معاي امشي بيه أي حتة وهو (مكوي).
• لكن عشان اعمل فرق ..واشعر بذلك الفرق – كنت بكويه للمناسبات المهمة فقط.
• والله يا جماعة بتذكر زمان كان بابكر الحلو باكمبا عندو (لفت)…بعمل بيها أي حاجة.
• أي شيء في الكورة بعملها بيها.
• أي حاجة تمر بخاطرك في الكورة ..كان باكمبا بعملها باللفت.
• الغريبة باكمبا وقت انتقل الهلال ..خلى (الشمال)..وبقى شغال بـ (اليمين).
• باكمبا جاب ليه قونين في المريخ بالطرشة.
• طوال فترة باكمبا في المريخ …(الطرشة) كانت قاعدة ساي..كانت تكاله.
• اول ما جاء الهلال باكمبا اشتغل باليمين.
• يمين وشمال.
• باكمبا كورتو كانت (ممتعة)..كورة (دقاق) كدا ..يقعد يونسك بيها لمن تشيلك نومة.
• لا بتعب.
• ولا بعرق.
• ولا نفسو بقوم.
• واقف في حتتو – بعمل الحاجات دي كلها.
• البتعب وبعرق ونفسو يقوم كان (الخصم) – لكن باكمبا ….ولا بوسخ (قميصو)..بطلع بيه بعد المباراة زي ما دخل بيه.
• باكمبا كان كدا.
• مفروض الهلالاب ما ينسوا دور باكمبا في الهلال.
• الزول دا ما قصر معانا.
• متعنا في الكورة والله.
• والحديث عن الماضي والآن ، وأنا بنط ليكم من حتة لي حتة ما تضيقوا.
• ما تستعجلو.
• زمان كان عندنا (مروحة) – وقت تشغلها في اتنين بتجيب ليك هوا بارد.
• ونحن كنا مبسوطين من الكلام دا.
• مبسوطين من الهوا البارد دا.
• الواحد ينوم لمن الواطة تمغرب.
• هسع تعال شوف نفس (المروحة) ..تشغلها في خمسة ومعاها 4 مكيفات ..وما بتجيب ليك غير (السموم).
• مراوح الزمن دا ما عندها (وفاء) ولا (اخلاص).
• الدنيا اتغيرت.
• زمان الدنيا كانت حلوة.
• قالوا ليك البقرة (الضاحكة) بتاعة جبنة لباشكري هي ذاتها جابت ليها الايامات دي (تكشيرة).
• تضحك على شنو يعني؟.
• نحن كل يوم بنسمع كلام.
• الكاردينال يجتمع باللجنة الاستشارية.
• الكاردينال يتحدث لقناة الهلال.
• الكاردينال في سنار.
• الكاردينال يفحص كورونا.
• الكاردينال يغادر للامارات.
• الكاردينال ماشي.
• الكاردينال شغال (تكتيك).
• الحاجات دي نحن كلنا عرفناها.
• حفظناها.
• عاوزين نسألكم بس..وين عصام كرار؟.
• وين محمد عبداللطيف هارون؟.
• وين ابوكلابيش؟.
• وين افكار؟.
• وين الدكتور حسن علي عيسي ؟.
• الجماعة ديل مشوا وين؟.
• …………
متاريس
• قالوا ليك (التش) داعم الكوارتي بشدة في انتخابات الهلال القادمة.
• التش عاوز الكوارتي يجي الهلال.
• عارفين ليه؟.
• عشان الكوارتي قال بجيب التش للهلال.
• التش عاوز يتخارج من الهلال.
• اتحركوا منذ الآن.
• التسجيلات ما بعيدة.
• وفي الساحة هناك عدد كبير من المواهب.
• الهلال عاوز ليه (8) – (7) لاعبين على الاقل.
• كشف الهلال بقى فاضي.
• الدفاع ما عندنا قلب دفاع.
• في الوسط عاوزين اكتر من لاعب ..في الارتكاز وفي صناعة اللعب.
• في الهجوم ما عندنا غير وليد الشعلة ومحمد موسي.
• الهلال عاوز ليه تشكيلة كاملة.
• ما تعملوها لينا كلها صراعات في الانتخابات.
• شوفوا هلالكم.
• وانجزوا من بدري بدري.
• ……….
• ترس اخير / مرات بحس انو ناس برشلونة ديل كورتهم بيلعبوها في (قروب) في الواتس.