السودان اليوم:
• الحكاية يمكن جس نبض ..
• الكاردينال عايز يشوف حبنا ليهو قدر شنو ..
• وهل متمسكين بإستمراره لدرجة كبيرة ..
• عايز يقلد حركات جمال الوالي لمن يتقدم بإستقالته من الوصيف ..
• الكلام الفوق دا قالوا لي واحد هلالابي متعصب جدا ..
• قلت ليهو طيب إنت رأيك شنو في بقاء كردنه من عدمه ..
• قال لي أقول ليك الحقيقة ..
• قول الحقيقة طوالي ..
• أنا خائف على الهلال اذا مشى الكاردينال ..
• حاليا منو الموجود في الساحة يملك إمكانيات أشرف ..
• رديت عليهو وقلت القروش ما حال حاجة ..
• قاطعني طوالي وقال لي منو القال ليك كدا ..
• في الكورة دي القروش هي كل حاجة ..
• ما عندك قروش ما بتقدر تعمل اي حاجة ..
• شبر ما بتمشي لي قدام ..
• لا بتقدر تتعاقد مع محترف أجنبي واحد ..
• خليك من محترف أجنبي .. اللاعب الوطني أصبح يطالب بقروش خيالية ..
• قال لي القصة حسابات ما كلام ساي ..
• لو بتتذكر المجالس السابقة ..
• الهلال دا كان غرقان في الديون ..
• الكردنة حل كل الديون دي بالرغم من ان الديون ما كانت في عهده ..
• قلت ليهو كلامك دا ما داخل لي في رأسي دا ..
• قال لي طبيعي عشان ان بتنظر للموضوع من جهة واحدة ..
• عشان فريق الكرة مستواه ضعيف ..
• قلت ليهو كلامك في محلو ..
• قال لي دا حال الكرة كدا ..
• أنا كمان قاطعته وقلت ليهو يا زول اذا امور فريقنا تمام زول بسألك تاني مافي ..
• ان شاء الله تقعد أكثر من 25 سنة زاتو ..
• هو كمان قاطع كلامي بحدة وقال لي نحن الهلال ما بنجامل فيهو ..
• الكاردينال دا لازم يواصل واذا رحل الهلال سيضيع ..
• ما تقول لي الكوارتي ولا اي زول تاني بقدر على المسؤولية دي ..
• دي مسؤولية كبيرة على اي واحد تاني غير الكاردينال ..
• طبعا سكت تاني ما قلت ليهو حاجة ..
• المهم في سري قلت والله اذا مستوى الفريق ما تطور للأفضل ما يقعد ثانية واحدة ..
• الزول دا قرب يطلع في موكب ويهتف فيهو ويقول يا كردنة (تفارق كيف تخلينا) ..
• يا ربي المشجع دا كلامو صاح ..
• القصة دي عايزه تفكير عميق ..
• يا زول أطرد الشيطان من رأسك تفكير شنو كمان ..
• كردنه يرحل بس ..
((صمت اخير)) ..
• أكيد بكرة أحلى وأجمل ..
The post يا كردنه تفارق كيف تخلينا ..!!.. بقلم محمد عثمان بلل appeared first on السودان اليوم.
